| Момчиња од Кавадарци на летен камп во Маврово |
 |
 |
 |
|
ПРЕТСТАВЕТЕ ЈА ОПШТИНАТА ВО НАЈУБАВО СВЕТЛО Вака гласи пораката од градоначалникот искажана на приемот во кабинетот Во организација на Американскиот мировен корпус во Македонија, од 25 во 31 јули на Маврово ќе се одржи летен камп за момчиња на возраст од 13 до 17 години. Општина Кавадарци на овој камп ќе биде застапена со 4 деца и тоа Драган Танчев (17), Диме Еленов (15), Ѓорѓи Шемов (13) и Лазар Николов (16). Нивни ментор е волонтерот од АМК во Кавадарци Кристин Мур која заедно со нив ќе присуствува во одмаралиштето Бунец на Маврово.
 Градоначалникот Александар Панов во својот кабинет ги прими децата кои на кампот ќе ја претставуваат нашата општина. Тие го запознаа со целите на нивниот престој во Маврово. Панов пак од своја страна им посака пријатен престој во кампот, и им порача достојно да ја претставуваат општината, и од таму да се вратат најмалку втори и да не дозволат да се наруши сликата за Општина која е во врвот на македонските локални самоуправи. Инаку според изјавата на Кристин Мур, кампот во Маврово има за цел децата од Македонија преку дружење со претставниците на Мировниот корпус и своите врсници да ги осознаат западните вредности и традицијата на живеење. Ќе се запознаат со вреднотите на граѓанското општество, а ќе бидат разработени и повеќе различни теми меѓу кои и Како да се биде лидер, потоа Етичко донесување на одлуки, Тимска работа, Личен Развој, вклучително здрав живот- начин на исхрана, штетност на пушењето и алкохолот, потоа ќе учат како се игра американски фудбал, безбол, како и читање на географски карти и ориентација во просторот. Во кампот ќе се предава целосно на англиски јазик, а покрај тоа ќе се организиаат и почетни курсеви за кинески и германски јазик. Коорганизатор е Црвениот крст на Македонија, кој ќе обезбеди постојано присуство на лекарски тим. Трошоците за престојот се целосно спонзорирани, а учесниците ќе треба да платат само за пат од своето место на живеење до Гостивар. Покрај стотината деца од Македонија учесници на кампот ќе бидат и триесет обучувачи волонтери од Американскиот Мировен Корпус.
     |